1 למנצח על־ידותון מזמור לדוד׃
2 אך אל־אלהים דומיה נפשי ממנו ישועתי׃
3 אך־הוא צורי וישועתי משגבי לא־אמוט רבה׃
4 עד־אנה תהותתו על איש תרצחו כלכם כקיר נטוי גדר הדחויה׃
5 אך משאתו יעצו להדיח ירצו כזב בפיו יברכו ובקרבם יקללו־סלה׃
6 אך לאלהים דומי נפשי כי־ממנו תקותי׃
7 אך־הוא צורי וישועתי משגבי לא אמוט׃
8 על־אלהים ישעי וכבודי צור־עזי מחסי באלהים׃
9 בטחו בו בכל־עת עם שפכו־לפניו לבבכם אלהים מחסה־לנו סלה׃
10 אך הבל בני־אדם כזב בני איש במאזנים לעלות המה מהבל יחד׃
11 אל־תבטחו בעשק ובגזל אל־תהבלו חיל כי־ינוב אל־תשיתו לב׃
12 אחת דבר אלהים שתים־זו שמעתי כי עז לאלהים׃
13 ולך־אדני חסד כי־אתה תשלם לאיש כמעשהו׃
Public Domain
Freely available for non-commercial use provided that this header is included in its entirety with any copy distributed. From the printed Code manual deposited with the electronic text: "The project was made possible ... by the gracious release granted by the Deutsche Bibelstiftung, Stuttgart, publishers of Biblia Hebraica Stuttgartensia."
